ANG “RAPTURE” USA KA PAGTULUN-AN NGA DILI GIKAN NI JESUCRISTO O SA BIBLIA

Usa sa mga bililhong pagtulun-an nga gitudlo ni JesuCristo mao ang “panahon sa katapusang mga adlaw” o “the teaching of the last things” nga diin “mabanhaw ang tanang mga nangamatay” ug pagahukman kauban sa mga buhi pa nga katawhan. Kining maong pagtulun-an gitin-aw ni Cristo diha sa pagbahin-bahin sa katawhan sa grupo sa mga “karnero” ug mga “kanding” sa dihang mobalik na pag-usab ang “anak sa tawo” uban sa mga balaang “anghel” nga mabasa nato diha sa ebanghelyo ni San Mateo Kapitulo 25, bersikulo 31-46. Ang “Catechism of the Church #988” milig-on niini sa iyang pag-ingon: “The Christian Creed－the profession of our faith in God, the Father, the Son, and the Holy Spirit, and in God’s creative, saving, and sanctifying action－culminates in the proclamation of the resurrection of the dead on the last day and in the life everlasting.” Mao kini ang gitoohan sa mga Apostoles ug sa mga Kristiyanos nga nagtoo ug nagsunod ni JesuCristo.

Apan adunay mga tawo karon sa bag-ong panahon nga gibaliwala kining maong pagtulun-an ni JesuCristo ug nag buhat buhat ug kaugalingong pagtulun-an tungod sa ka walay alamag ni Cristo o sa Biblia. Kining maong pagtulun-an gitawag nila ug “Rapture”! Siguro may pipila kanato na nakadungog na niining pulunga apan wala makasabot sa buot ipasabot sa maong pagtulun-an. Sa makausa pa akong balikon kining maong pagtulun-an wala nagagikan o wala gitudlo sa atong Ginoong JesuCristo o kaha sa Balaang Kasulatan.

Kinsa man ang nagpasiugda sa doktrina sa “rapture” kung kini wala gitudlo ni JesuCristo o sa Biblia?

Sa tinuod lang bisan pa ug balibalihon nimo pagpakli ang balaang kasulatan wala gayud kitay makita nga pulong “rapture”. Ang doktrina nga “rapture” usa kini ka “deception” o “pagpanglimbong” sa mga dili katoliko nga mga magtutudlo, ilabi na gayud sa mga “evangelicals” ug mga “fundamentalists” o sa gitawag sa bag-ong panahon nga mga “born again christians” aron nga sakmiton o ipalayo ang katawhan gikan sa Santa Iglesia Catolica, ang matuod nga simbahan nga gitukod ni JesuCristo.

Milutaw o mituyhakaw ang doktrina sa “rapture” niidtong tuig 1830 nga gipasiugdahan sa usa ka protestant minister sa Scotland nga mao si Ministro Edward Irving. Siya ang nagpasiugda sa pagwali niining maong pagtulun-an diha sa gitawag nya ug “rapture gospel”. Subo kaayong palandungon nga daghan kaayong mga “born again Christians” nagtoo nga kaning maong sayop nga pagtulun-an nagagikan sa mga apostoles ug ni JesuCristo. Ang doktrina o pagtulun-an sa “rapture” wala gayod basehan nga gitudlo sa atong manluluwas o kaha sa mga apostoles o sa Santa Iglesia Catolica nga gibilin ni Cristo aron sa pagpadayon sa pagtudlo kanato!

Unsa man ang ilhanan niining pagtulun-an nga“rapture”?

Ang timailhan niining maong pagtulun-an nga gitudlo sa mga tigpasiugda niining “rapture” mao ang pagpanghadlok sa katawhan na;

 Una, “nga ang kalibutan matapos ug ang mga pinili lamang ang sakmiton o kuhaon o bayawon sa Dios sama sa usa ka pagpamilok aron mahalikay o ilikay sila sa kasakit nga matagamtaman sa kalibutan.Ug ang mga wala mosunod o mosulod sa ilang grupo sakiton dinhi sa yuta.”

Ikaduha, ug uban niining maong pagpanghulga na matapos na ang kalibutan ug sila lang ang tabangan sa Dios nga dili sakiton tungod kay sila lang ang ‘sakmiton’ o bayawon (rapture) sa Dios mao ang “paghatag nila ug mga dates sa calendar kung kanus-a ang pagsakit sa kalibutan ug nianang panahoma sila kuhaon sa Dios sama sa pagmamilok.UG SILA LANG ANG MALUWAS!”

Nakahinumdum pa kita niadtong Year 2000, sila ang nag-ingon nga matapos na ang kalibutan ug ma “rapture” na sila kay mga boutan na sila! Apan wala madayon ang ilang giingon mao niusab nasad sila ug hatag ug date sa katapusan sa kalibutan ug kini niadtong May 21, 2011 ug nabaniog pa kini sa Pilipinas, resulta wala madayon kay basin na traffic si Lord! Mao nga ila nausab gibalhin sa October 21, 2011. Ug daghan pang ubang mga dates nga ilang giingon apan wala kini mahitabo kay matud pa lagi sa Ginoong JesuCristo: “Apan walay nasayod kanus-a moabot kadtong adlawa o taknaa, bisan ang mga anghel sa langit, bisan gani ang Anak; ang Amahan lamang maoy nasayod.” (Marcos 13:32)

Unsa man ang mga basehanan sa mga nagpasiugda niining pagtulun-an nga“rapture”?

Ubay ubay ang mga texto sa biblia nga ilang gikutlo nga kono nagsuporta sa ilang gibuhat-buhat nga pagtulun-an. Tan-awon nato kining mosunod nga mga pagtuki:

1.      Siguro mas mayo nga unahon nato pagtuki ang nasulat sa Unang Sulat ni San Pablo ngadto sa mga taga-Tesalonica (4:17) sa pulong nga “rapiemur” o “rapere” sa latin language. Ug basahon nato nga tibook gayud ang maong nasulat ni San Pablo aron masabtan nato unsa ang buot ipasabot.

“(13) Mga igsoon, buot kami nga masayod kamo sa kamatuoran mahitungod niadtong nangamatay na aron dili kamo maguol sama sa mga tawo nga walay paglaom. (14) Kita nagtuo nga si Jesus namatay ug nabanhaw. Busa tungod kang Jesus banhawon ug dad-on sa Dios uban kaniya kadtong nangamatay nga nagtuo kang Jesus. (15) Ang pagtulon-an sa Ginoo nga gitudlo namo kaninyo mao kini: kita nga buhi pa inigbalik sa Ginoo dili mag-una niadtong nangamatay na. (16) Unya mabati ang singgit sa pagmando ug ang tingog sa arkanghel ingon man ang lanog sa trumpeta sa Dios ug mokunsad ang Ginoo gikan sa langit. Maoy unang mabanhaw kadtong nangamatay nga nagtuo kang Cristo. (17) Unya kita nga buhi pa niadtong adlawa, bayawon uban kanila didto sa mga panganod aron pagsugat sa Ginoo. Ug kita unya uban na kanunay sa Ginoo.” (1 Tesalonica 4:13-17)

Ang pulong nga “bayawon” mabasa kini nga “caught up” sa english word apan gikan kini sa pulong nga “harpazó ἁρπάζω” sa greek word. Ang atong gikutlo nga kapitulo ug bersikulo sa itaas WALA NAGTUDLO ug “rapture” o ang pagsakmit o pagbayaw sa mga magtotoo aron dili maapil sa “pre-tribulation” o “kasakitan” kondili nagtudlo kini kanatong mga Christians mahitungod sa panghitabo sa “ikaduhang pagbalik ni JesuCristo” － sama sa pagkabanhaw sa tanang mga nangamatay, ang pagkahimong mga espiritohanong nilalang sa tanang mga buhi, ang pagkabuntog sa kamatayon, ang paghukom sa mga buhi ug sa mga minatay, ang pagtulun-an sa langit ug empyerno…ug kini mahitabo sama sa usa ka pagpamilok sa mata sa ikaduhang pagbalik ni JesuCristo.

Atong nasayran dinhi sa bersikulo 13 nga gisulat kini ni San Pablo sa mga nagbangutan nga mga magtotoo sa Tesalonica sa kamatayon sa mga magtotoo nga wala nila damha! “Mga igsoon, buot kami nga masayod kamo sa kamatuoran mahitungod niadtong nangamatay na aron dili kamo maguol sama sa mga tawo nga walay paglaom.” (1 Tesalonica 4:13). Mao nga gipasabot sila ni San Pablo nga dili na angay magbangutan kay “(14) Kita nagtuo nga si Jesus namatay ug nabanhaw. Busa tungod kang Jesus banhawon ug dad-on sa Dios uban kaniya kadtong nangamatay nga nagtuo kang Jesus.”

2.      Ikaduha nga ilang kutloon mao ang ebanghelyo ni San Juan 5:28-29. Sa makausa pa WALAY RAPTURE NGA GITUDLO SA EBANGHELYO!

“Ayaw kamo kahibulong kay moabot ang panahon nga ang tanang mga patay makadungog sa iyang tingog, ug manggula sila sa ilang lubong: kadtong maayog binuhatan mabanhaw ug mabuhi sa dayon ug kadtong daotag binuhatan mabanhaw apan silotan.” (Juan 5:28-29).

Ang mga “bakakong magtutudlo”sa pagtulun-an sa “rapture” moingon nga sila lamang ang banhawon ug una, unya pagkahuman sa usa ka libo ka tuig (1,000 years) ang mga daotan mao pa banhawon! Atong makita dinhi sa ebanghelyo nga walay usa ka libo o 1,000 years nga paaboton aron banhawon sa Dios ang mga daotan o kaha unahon sila nga banhawon sa Dios! Ang tanang tawo nga naa sa lubnganan na madaotan man o maaayong tawo magdungan sa pagkabanhaw sama sa usa ka pagpamilok sa mata ug DILI 1,000 YEARS!

3.      Ikatulo nga atong tukion ang ilang kutloon nga teksto sa Daniel 12:2-3.

"Ugdaghan sa mga nangamatay nga atua na sa lubnganan mabanhaw ngadto sa kinabuhing dayon ug ang uban ngadto sa kaulawan nga walay kataposan. 3Ang mga maalamon mosidlak sama sa kahayag sa kalangitan ug kadtong nakakabig ug daghan ngadto sa pagkamatarong modan-ag hangtod sa hangtod sama sa mga bituon.” (Daniel 12:2-3).

Sa samang paagi WALAY “RAPTURE” DINHI NIINING MAONG TEKSTO! Dinhi atong makita nga walay unahon pagkuha sa Dios nga buhi aron malikay sa kasakit ug ang uban magpaabot pa ug usa ka libo. Dunganon ang TANANG PATAY bootan man o daotan nga banhawon aron hukman! Sa langit ang bootan ug ang mga daotan IMPAS!

4.      Ang 1 Corinto 15: 21-28 usab ilang gamiton sa ilang pagbuhat-buhat ug doktrina nga “rapture”. Atong tan-awon kung mohaum bas sa ilang mga bakak nga pagtulun-an!

"Kay ingon nga ang kamatayon miabot pinaagi sa usa ka tawo, moabot usab ang pagkabanhaw pinaagi sa usa ka tawo. Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Cristo. Apan ang pagbanhaw sa matag usa himoon sa hustong han-ay: si Cristo maoy una sa tanan, unya mosunod kadtong iya ni Cristo inig-abot na niya. Unya moabot ang kataposan ug buntogon ni Cristo ang tanang pangulo, mga awtoridad ug mga kagamhanan. Unya itugyan niya ang Gingharian ngadto sa Dios nga Amahan. Kay kinahanglan nga maghari si Cristo hangtod mabuntog sa Dios ang tanan niyang mga kaaway ug himoon sila nga tumbanan. Ang kataposang kaaway nga buntogon mao ang kamatayon. Kay ang kasulatan nag-ingon, “Himoon sa Dios ang tanang butang nga iyang tumbanan.” Hinuon, klaro kaayo nga niini wala mahilakip ang Dios nga nagbuhat aron ang tanang butang mahimong tumbanan ni Cristo. Apan sa dihang ang tanang butang nailalom na sa pagmando ni Cristo, siya mismo, ang Anak, magpailalom sa paghari sa Dios. Ang Dios maoy nagbuhat aron ang tanan mailalom sa pagmando ni Cristo. Si Cristo nagpailalom sa pagmando sa Dios aron ang Dios maoy maghari sa tanan sa hingpit gayod." (1 Corinto 15: 21-28).

Dinhi ang sulti ni San Pablo nga ang ikaduhang pagbalik ni JesuCristo MAO NA ANG KATAPUSAN! Walay 1,000 Years usa pa matapos! Gitudlo ni San Pablo nga si JesuCristo NAGHARI NA KARON! Ug panahon sa Ikaduhang Pagbalik ipailalom sa Anak ang paghari sa iyang Amahan! Ang mga nagtudlo sa “rapture” moingon nga si Cristo wala pa maghari karon kondili magsugod ang paghari ni Cristo sa ikaduhang pagbalik pa! Tin-aw kaayo dinhi nga ang “rapture” usa ka baliktad ug tomo-tomo nga pagtulun-an sa biblia. Usa ka bakak nga pagtulun-an kini ug kinahangalan nga atong isalikway! Sama sa giingon ni San Pablo sa mga taga Galasya na tunglohon ang magtudlo ug bakak bisan pa ug usa ka anghel nga gikan sa langit! (Galasya 1:8).

5.      Ang katapusan na atong tan-awon mao ang sulat ni San Pablo ngadto sa mga taga-Corinto.

“Mao kini ang misteryo: dili ang tanan kanato mamatay apan kitang tanan kalit nga mangausab sama kakalit sa usa ka pagpamilok. Mahitabo kini inigtingog sa kataposang trumpeta. Kay inigtingog niini, ang mga patay banhawon aron dili na gayod mamatay. Ug kita mangausab. Kay kining lawas nga madunot kinahanglan magsul-ob sa pagkadili na madunot ug kining lawas nga mamatay, kinahanglang magsul-ob sa pagkadili na mamatay.” (1 Corinto 15:51-53).

Mga kaigsoonan, makita nato dinhi nga nga ang ikaduhang pagbalik ni JesuCristo pagabanhawon ang mga patay ug dili na gayud mamatay, ug ang mga buhi usab sa samang panahon manga-usab ug ang lawas nga madunot magsul-ob sa lawas na nga dili mamatay! Karon mangutana kita, ASA MAN ANG GIINGON NGA MAUNSA SILANG MGA MA-RAPTURE KAY SILA MGA BOOTAN? ASA MAN NGA MAGHULAT PA USA KA LIBO o 1,000 YEARS ang mga dautan aron banhawon? ANG ATONG TUBAG MAO NGA WALA! Ug kini nagpasabot nga ang “rapture” nga pagtulun-an wala nag gikan kang JesuCristo ug wala kini gitudlo sa mga apostoles ug dili kini makita sa balaang kasulatan!

Sayop Ba Ang Katoliko Tungod Kay Adunay Larawan o Imahen?

Pasiuna

“Ang mga Katoliko nagsimba sa Imahen!” mao kini ang kanunay nga pasangil sa mga dili ingon nato nga mga Katoliko. Usa ka kamatooran nga mga Katoliko adunay mga imahen sa ilang mga simbahan ug bisan gani sa ilang mga kabalayan ug tunogd niini nagtoo ang mga dili Katoliko nga usa ka dakong sala ug kini supak sa balaod sa Diyos. Ngano man nga nakaingon man sila niini? Tungod kay diha sa balaang kasulatan nagkanayon: sa Exodus mao kini ang nakasulat: 

“Alang kanimo dili ka magbuhat ug usa ka larawan nga linilok bisan sa dagway sa bisan unsang butanga nga atua sa itaas sa langit, kun dinhi sa ilalum sa yuta, kun sa anaa sa tubig sa ilalum sa yuta: Dili mo iyukbo ang imong kaugalingon kanila, ni mag-alagad kanila; kay ako si Ginoo nga imong Dios, mao ang Dios nga abughoan, nga nagadu-aw sa pagkadautan sa mga amahan sa ibabaw sa mga anak, sa ibabaw sa ikatolo ug sa ibabaw sa ikaupat ka kaliwatan sa mga nagadumot kanako.” (Exodus 20:4-5)

Unya gidasonan pa gayud kini sa pag-ingon diha sa Exodus: 

“Oh, kining katawhan nakasala ug usa ka dakung sala, ug nagbuhat sila ug mga dios nga bulawan.” (Exodus 32:31) 

Ang Simbahang Katoliko nagtoo nga usa ka insakto nga gawi ang pagbadlong sa mga tawo nga nagbuhat ug diyos-diyos tungod kay usa kini ka dakong salaod atubangan sa tinuod nga Diyos. Apan ang pag-negar nga ang mga Katoliko o ang Simbahang Katoliko nakahimo ug salaod nga diyos-diyosan tungod kay nagbaton kini ug mga imahen o larawan sa atong Ginoong JesuCristo o kaha sa mga Santos, usa kini ka tumo-tumo ug pagka-walay hanaw sa matuod nga pagtulon-an sa mga imahen ug sa mga larawan nga anaa sa Santa Iglesia Catolica. O kaha usa ka panghuna-huna nga wala gipasikad sa matuod nga pagtulon-an sa Diyos nga naa sa Balaang Kasulatan. 

Ubay –ubay nga mga grupo nga nagpunay ug pangdaot sa Simbahang Katoliko tungod sa kay lagi nagbaton kini ug mga imahen o larawan sama pananglit sa mga Iglesia Ni Cristo nga gitukod ni igsoong Felix Manalo, mga Born Again, Sabadista, Mormons, Baptists ug uban pang mga protestanteng grupo ug maisugong nagpadayag nga “Ang Dios nagdili sa mga lawaran diha sa pagsimba.” 

Apan kung atong lantawon ug susihon pag-ayo ang nakasulat sa balaang kasulatan, atong masayran nga bakak ang maong negar o pasumangil nga gidili ang pag-gamit ug imahen o larawan isip usa ka relihihiyosong kagamitan. Ang nasulat sa balaang kasulatan mao nga ang Diyos nagdili sa pagsimba sa imahen o larawan, apan wala kay mabasa nga ang Diyos nagdili sa pag-gamit ug mga imahen o larawan sa relihiyosong paagi. 

Ang mosunod nga mga ponto akong ipadayag ang mga importanteng mga rason o saysay ngano nga ang Santa Iglesia Catolica nga mao ang tinukod ni JesuCristo nagbaton man ug mga imahen o larawan sa iyang mga relihiyosong pagsaulog sa pagtoong Kristohanon.

I. Ang Diyos Nagsugo Nga Magbuhat Ug Larawan 

Ang mga tawo nga nagpunay ug saway sa Simbahang Katoliko tungod kay nagbaton kini ug imahen nakalimot ug ignorante sa kamatooran diha sa balaang kasulatan nga ang Ginoo mismo nagsugo nga magpabuhat ug imahen o larawan. Sama pananglit diha sa Exodus diin ang Diyos nagkanayon: 

rebulto sa duha ka anghel nga gipabuhat sa Diyos

“Ug magbuhat ka ug duruha ka mga querubin nga bulawan, sa buhat nga sinalsal pagabuhaton mo kini, diha sa duruha ka tumoy sa halaran-sa-pagpasig-uli. Ug magbuhat ka ug usa ka querubin sa usa ka tumoy, ug usa ka querubin sa lain nga tumoy: sa nayon gayud sa halaran-sa-pagpasig-uli magabuhat ka ug mga querubin sa duruha ka tumoy niini. Ug ang mga querubin magabuklad sa ilang mga pako sa ibabaw, nga magatabon sa halaran-sa-pagpasig-uli: uban sa ilang mga pako; ang ilang mga nawong magaatubang sa usa ug usa, magatan-aw sa halaran-sa-pagpasig-uli ang mga nawong sa mga querubin.” (Exodus 25:18-20) 

Dinhi tin-aw kaayo nga ang Diyos nagsugo nga magbuhat ug larawan sa mga Anghel o querobin. 

Sa pikas nga bahin gihatag ni David ang plano sa pagpahimo sa balcon sa templo ngadto sa iyang anak ng si Solomon sa pag-ingon: 

Gihatag ni Davai ang plano sa templo kang Solomon

“alang sa halaran sa incienso inulay nga bulawan nga tinimbang; ug bulawan alang sa sulondan sa carro, bisan ang mga querubin, nga nagbuklad sa ilang mga pako, ug nagtabon sa arca sa sugo sa Diyos. Kining tanan, nag- ingon si David, ako gipasabut sa sinulat nga gikan sa kamot sa Diyos bisan sa tanang bulohaton niining sulondan.” (1 Cronicas 28: 11, 18)

Ang plano ni David sa templo, ug ang magsusulat sa Bibliya, nagtug-an kanato nga “kining tanan, gipasulat gikan sa kamot sa Diyos,” ug lakip na niini ang mga imahen o larawan sa mga Anghel. 

Sa samang paagi nagsaysay kanato ang libro sa Ezekiel mahitungod sa kinulit nga imahen o larawan. 

“Nianang kinal-angan ibabaw sa ganghaan, bisan ngadto sa nahasulod nga balay, ug sa nagawas, ug sa tanang bongbong maglibut, sa sulod ug sa gawas, pinaagi sa sukod. Ug kini hinimo uban sa mga querubin ug mga kahoyng palma; ug usa ka kahoyng palma gitaliwad-an sa duruha ka querubin, ug ang tagsatagsa ka querubin may duruha ka nawong; Sa pagkaagi nga dihay nawong sa tawo nga nagaatubang sa kahoyng palma sa usa ka kilid, ug ang nawong sa batan-ong leon paingon sa kahoyng palma sa pikas nga kilid. Sa ingon niini kini ginahimo sa tibook balay nga maglibut: Gikan sa yuta hangtud sa itaas sa ganghaan may gihimong mga querubin ug mga kahoyng palma, mao kini ang bongbong sa templo.” (Ezekiel 41:17-20)

II. Ang Pag-gamit ug Imahen o Larawan sa Relihiyosong Paagi 

Taliwala sa "plaque of serpents" aron sa pagsilot sa mga Israelitas sa kapanahonan sa exodus, ang Diyos miingon kang Moises: 

ang rebulto sa bitin nga tumbaga nga gipabuhat sa Diyos

“Magbuhat ka ug usa ka bitin nga mapintas; ug kini ibutang mo sa ibabaw sa usa ka bandila; ug mahitabo nga bisan kinsa nga pahiton, sa diha nga motan-aw niini, mabuhi siya. Ug si Moises nagbuhat ug usa ka bitin nga tumbaga, ug gibutang niya sa ibabaw sa bandila. Ug mahatabo nga kong adunay bitin nga makapahit sa bisan kang kinsa, sa diha nga siya makatan-aw sa bitin nga tumbaga, mabuhi siya” (Numero 21:8-9). 

Gikinahanglan gayud nga ang napaakan sa bitin mohangad ug motan-aw sa bitin nga ginama sa bronse aron nga mamaayo siya ug dili mamatay. Kini nagpasabot nga ang larawan o statuwa magamit usab diay sa ritwal relihiyoso ug dili lamang usa ka dayan-dayang relihiyoso. 

Ang mga Katoliko nag-gamit ug mga estatuwa, kwadro nga hulagway, ug uban pang mga kagamitang binatid o “artistic devices” aron nga mahinumduman ang usa ka butang o usa ka tawo nga gipamalandungan. Pinaagi sa paglantaw sa hulagway sa atong inahan atong mahinumduman ang atong inahan, ug sama sa paglantaw sa mga hulagway sa mga Santos makatabang kanato nga mahinumduman usab ang maong Santo.

Ang Simabahang Katoliko nag-gamit usab ug mga estatuwa aron sa pagtudlo sa mga bililhong butang sa pagtoo. Sa unang panahon ang mga estatuwa nakatabang sa pagtudlo mahitungod sa pagtoo niadtong mga tawo nga dili kamao mobasa o kaha mosulat – o mga illiterare. Ubay-ubay nga mga Protestante nga nag-gamit ug hulagway ni Kristo ug mga bible pictures sa ilang Sunday School aron sa pagtudlo sa mga kabataan, ilabi na sa mga kabataan nga dili pa kahibalo mobasa o mosulat.

mga rebulto sa mga protestante panahon sa pasko

Ang mga Katoliko usab nag-gamit ug mgaestatuwa aron sa pagsaulog sa kapistahan sa Santos o mga relihiyosong kasaulogan, ug sama sa mga Protestante nga maghimo sila ug “three-dimensional nativity scene” sa panahon sa pasko, ang panahon sa pagsaulog sa pagkatawo sa atong Ginoo.

mga imahen nga anaa sa INC

Bisan gani ang mga Iglesia Ni Cristo nga gitukod ni Igsoong Felix Manalo sa Pilipinas nagbaton ug mga larawan diha sa ilang mga simbahan sama sa larawan sa mga mananap nga karnero o kaha kalapati. Ug duna usab silay larawan nga walay kinabuhi sama sa timbangan.

rebulto ni Felix Manalo

Ug ang pinaka-kungkreto nga larawan nga ilang gibatonan mao mismo ang estatuwa ni Igsoong Felix Manalo nga makita sa ilang Central Temple. Ako wala magtoo nga kining mga butanga ilang gibatonan aron ilhon nga Diyos kondili aron pagpakita o pagtudlo sa pagtoo o kaha paghatag ug pagtahud sa ilang magtutukod nga si Igsoong Felix Manalo.

Kung ang atong timbangan o basihan sa mga diyos-diyosan mao ang pag-gamit sa kinulit nga mga imahen, larawan, ug estatuwa, nan makaingon kita nga ang protestante nagbansay-bansay usab ug diyos-diyosan o “idolatry”. 

Apan ang kamatuoran walay “idolatry” o diyos-diyosan nga nahitabo niining maong panghibabo. Ang gidili sa Diyos mao ang pagsimba isip Diyos sa mga larawan, imahen, hulagway o estatuwa. Wala gidili sa Diyos ang pagkulit o paghimo ug mga larawan. Ug mahitungod sa bitin nga bronse nga gigamit ni Moises ang Diyos nagpadayag kanato nga ang Diyos wala magdili sa pagkulit ug labi na nga wala ang Diyos magdili sa pag-gamit niini diha sa relihiyosong ritwal. 

Sa dihang ang tawo mosimba sa imahen o larawan isip iyang Diyos mamahimong masilag ang Diyos nianang tawhana. Kung iyang alisdan ang Diyos sa dili tinuod nga diyos ug misimba niining dili tinuod nga Diyos ang Diyos masuko niini. Sa samang paagi sa dihang ang katawhan misugod na pagsimba sa bitin nga bronse isip ilang diyos nga ilang ginganlan kini ug “Neshushtan”, ang mahadlokon sa Diyos nga si Hari Hezekiah iya kining gigun-ob diha diha dayon (2 Hari 18:14).

III. Unsa Man Ang Kabahin Sa Pagyukbo? 

Usahay gamiton sa mga dili Katoliko ang libro sa Deuteronomio sa dihang miingon ang Diyos mahitungod sa pakyukbo o bow sa diyos-diyos: “Dili mo iyukbo ang imong kaugalingon kanila….” (Deuteronomio 5:9). 

Tungod kay ang mga Katoliko moyukbo o kaha molohod atubangan sa imahen ni Jesus ug sa mga Santos ang mga dili Katoliko nangalibog sila sa pagtino sa kalainan sa pagyukbo atubangan sa imahen ni Jesus o mga Santos isip pagtahud ug sa diyos-diyos. Ang mga Katoliko sa ilang pagyukbo atubangan sa mga imahen ni Jesus o sa mga Santos wala mag-ila nga diyos kini kondili usa ka lihok sa pagtahud. 

Atong sayron nga bisan tuod ang pagyugbo mamahimong paagi sa pagsimba wala nagpasbot o "it does not qualify" nga ang tanang pagyukbo usa ka pagpaila nga nagsimba ka. Sa Japan, usa sa paagi nga ipakita ang ilang pagtahud mao ang pagyukbo apan wala kini nagpasabot nga pagsimba. 

ang pagyukbo sa Japan

Sa Japan ang pagyukbo usa ka paagi sa pagpakita sa pagyukbo o kaha usa pagpangumusta sa tawo nga imong gikahinagbo, sama kini sa paglamohay sa mga kamot kung naa pa kita sa Dakbayan sa Dabaw o kaha alang sa mga Filipinos. 

Sa samang paagi pwede usab moluhod ang usa ka alagad atubangan sa usa ka Hari sa walay pagsimba niini isip diyos. 

Ang mga Katoliko usab pwede nga moyukbo o molohud atubangan sa imahen o larawan nga mag-ampo nga walay pag-ila nga kini diyos. Kung mag-ampo ang Katoliko moingon siya: “Amahan Namo nga anaa ka sa langit” (Mateo 6:9) ug dili gayud siya moingon nga anaa sa imahen o larawan.

Wala ako magtoo nga ang mga Protestante samtang nag-ampo motapion sa ilang mga kamot sa Biblia ug nakaluhod nga kini nagpasabot na ug diyos-diyos o kaha giampuan nila ang Biblia isip diyos. Sila nagbuhat niini isip pagtahud sa Biblia nga pulong sa Diyos ug dili aron simbahon isip diyos. 

Panghinapos

Ako nanghinaut nga ang mga kamatooran nga atong gihisgutan dinhi niining hamobo nga pagpasabot. Ako mag-ampo sa makagagahum nga masabtan unta kining mga kamatooran sa mga tao nga wala pa makasabot pinaagi sa giya sa Balaang Espiritu. Amen.

NGANONG KITANG MGA KATOLIKO MANGAON MAN UG KARNE SA BABOY?

Tinood nga diha sa Balaang Kasulatan usa kini ka kamatooran nga walay "letra por letra" nga mabasa nato nga ipakaon ang unod sa baboy tungod kay alang sa mga Judeo ang baboy hugaw kini, busa ginadili ang pagkaon sa karne sa baboy. Mao kini ang kamatooran nga nakasulat sa Daang Kasulatan nga dili kini ipakaon isip usa ka "Balaod Sa Kan-onon" o "Dietary Law" sa mga katawhang Hudeo:

"Ang baboy bisan tuod pikas ang kuko niini, dili man kini mousap, busa hugaw kini alang kaninyo. Ayaw kamo pagkaon sa karne niining mga mananapa ni mohikap sa ilang patayng lawas, kay hugaw man sila alang kaninyo." (Leviticus 11:7-8). 

Atong timan-an nga ang mga Judeo bisan karon gidili sa kanila ang pagkaon sa karne sa baboy. Apan alang kanatong mga magtotoong Kristyanos, pinasikad sa kabobot-on nga gipakita ni JesuCristo, iyang gitagaan ug bag-ong kahulugan ang balaod sa mga Judeo. Matud pa sa tudlo sa Simabahang Katoliko diha sa bag-ong Katesismo nagkanayon: 

"Ang kanhing balaod natuman diha ni Jesus. Ang balaod wala giwagtang, hinoon gitawag ang tawo nga iyang kaplagon pag-usab ang balaod diha mismo sa iyang agalon (Jesus) nga mao ang hingpit nga katuman niini." (Cathechism of the Catholic Church #2053).

Isip usa ka laktud nga pananglitan, atong makita diha sa Bag-ong Kasabutan nga dunay "kaugnaan mahitungod sa Balaod sa Kan-onon" o "rediscovery of the Dietary Law". Si Jesus mismo naghatag ug bag-ong pagsabot nga pwede na natong kan-on ang bisan unsa nga makaon ug lakip na niini ang pagkaon sa karneng baboy: 

'Ug si Jesus miingon kanila:

"Wala ba diay usab kamoy pagsabut? Wala ba ninyo palandunga nga bisan unsay magasulod sa tawo gikan sa gawas dili makapahugaw kaniya, sanglit dili man kini mosulod sa iyang kasingkasing kondili nganha man lamang sa iyang tiyan, ug busa igaitsa ra sa gawas?" (Sa ingon niana iyang gipahayag nga malinis diay ang tanang kan-onon.) Ug siya miingon, "Ang nagagula gikan sa sulod sa tawo mao ang makapahugaw sa tawo. Kay gikan sa sulod, gikan sa kasingkasing sa tawo, nagagula ang mga dautang hunahuna (Marcos 7:18-21)." 

Gidasonan kini diha sa Buhat sa nga Apostoles diin si San Pedro gipasabot nga pwede na siya mokaon bisan unsa nga karne diha sa iyang nakitang panan-awon. 

"Apan si Pedro miingon, "Dili ko, Ginoo; kay wala pa gayud akoy nakaon nga dili binalaan o nga mahugaw."Ug ang tingog miabut kaniya pag-usab sa ikaduha nga nag-ingon, "Ayaw paghinganlig dili binalaan ang mga butang nga nahinloan na sa Dios." Dinhi tin-aw kaayo nga ang mga kalan-on dili nato ilhon nga hugaw kay kini nahinloan na sa Dios. (Buhat 10:9-15) 

Sa pikas nga bahin, kinsa ba ang maka-ingon nga hugaw ang kalan-on? Dili ba adunay man kita'y Buhatan Panglawas (Department of Health) nga may katungdanan nga mosuhid sa hugaw o dili hugaw nga pagkaon? Busa kung atong lantawon sa mapik-oton nga bahin dili gayod sakop sa kaluwasan ang pagkaon o dili pagkaon sa pipila ka mga kalan-on, gawas lamang kung adunay Relihiyosong katarungan sa dili pagkaon niini. Sama pananglitan, panahon sa Cuaresma kitang mga Kristiyano gitawagan ug giawhag ang dili pagkaon ug mga lamian nga mga kalan-on lakip na niini ang karne sa baboy, dili tungod kay kini mahugaw kondili usa ka panawagan nga lantawon nato pagbalik ang kasakitan ug kaluwasan nga dala ni Cristo diha sa kasakitan nga iyang natagamtaman. Ug nga pinaagi sa dili nato pagkaon ug mga lamian nga mga pagkaon, ang kwarta nga atong nahipos tungod niinang maong pag-antus atong mapaambit niadtong mga timawa ug walay sarang makaon. 

Diha Bag-ong Tugon, atong makita usab diha sa sulat ni San Pablo ngadto sa mga taga-Roma ang pagtulon-an sa pagkaon. Siguro ako na kining nahisgutan sa unahan sa dihang miingon ako nga ang pagkaon o dili pagkaon sa pipila ka mga kalan-on walay labot sa atomg kaluwasan. Diha sa Roma nagkanayon si San Pablo: 

"Mahitungod sa tawo nga maluyag pagtoo, dawata ninyo siya, apan dili aron sa pagsaway sa iyang mga dinahumdahum. Kay ang usa ka tawo nagatoo nga makakaon siyag bisan unsa, samtang ang tawong maluya magakaon ug mga utanon lamang. Ang nagakaon kinahanglan dili magtamay sa wala magkaon, ug ang wala magkaon kinahanglan dili maghukom sa nagakaon, kay kini siya gidawat man sa Dios. Si kinsa ka ba nga magahukom sa binatonan sa lain? Sa atubangan sa iyang agalon siya anha mobarug o mapukan. Ug siya pabarugon kay ang Agalon makahimo man sa pagpatindog kaniya. Ang usa ka tawo nagailag usa ka adlaw ingon nga labi pang maayo kay sa ubang adlaw, samtang ang laing tawo nagaila sa tanang mga adlaw ingon nga managsama ra. Kinahanglan ang matag-usa ka tawo adunay hingpit pagkadani diha sa iyang kaugalingong hunahuna. Ang nagabantay ug adlaw, nagabantay niini sa pagpasidungog sa Ginoo. Ug siya usab nga nagakaon, nagakaon sa pagpasidungog sa Ginoo, sanglit nagapasalamat man siya sa Dios; ug siya nga wala magkaon, wala magkaon sa pagpasidungog sa Ginoo ug nagapasalamat sa Dios. Walay usa kanato nga nagmabuhi alang sa iyang kaugalingon, ug walay usa kanato nga mamatay alang sa iyang kaugalingon. Kon kita nabuhi, nabuhi kita alang sa Ginoo; ug kon kita mamatay, mamatay kita alang sa Ginoo; sa ingon niana, mabuhi kita o mamatay, iya kita sa Ginoo. Kay alang niining maong tuyo si Cristo namatay ug nabuhi pag-usab aron mahimo siyang Ginoo sa mga patay ug sa mga buhi. Nan, nganong magahukom ka man sa imong igsoon? O ikaw, nganong magatamay ka man sa imong igsoon? Kay kitang tanan moatubang ra unya sa hukmanan sa Dios; kay nahisulat kini nga nagaingon: Maingon nga ako buhi, nagaingon ang Ginoo, ang tanang tuhod magaluhod sa atubangan ko, ug ang tanang dila magadayeg sa Dios." Sa ingon niana ang matag-usa kanato magahatag unyag husay ngadto sa Dios mahitungod sa iyang kaugalingon. Busa kinahanglan dili na kita maghinukmanay ang usa sa usa, hinonoa kinahanglan magahunahuna kamo sa dili gayud pagbutang ug kapangdolan o makabalda diha sa agianan sa inyong igsoon. Pinaagi sa Ginoong Jesus nasayud ug masaligon ako nga walay butang nga mahugaw diha sa kinaiya niini; apan kini mahugaw alang sa tawo nga magahunahuna nga mahugaw kini. Kay kon tungod sa imong pagkaon nasubo ang imong igsoon, nan, wala na ikaw magagawi diha sa gugma. Ayaw tugoti ang imong kan-on nga maoy makaingon sa pagkawagtang sa tawo kang kinsa nagpakamatay si Cristo. Busa ayaw ninyo tugoti nga panamastamasan pagsulti ang gipakamaayo ninyo.Kay ang gingharian sa Dios dili kalan-on o ilimnon, kondili pagkamatarung ug pakigdait ug kalipay diha sa Espiritu Santo. Siya nga sa ingon nagaalagad kang Cristo pagakahimut-an sa Dios ug pagauyonan sa mga tawo. Busa kab-uton ta ang makaamot sa pagdinaitay ug sa paglig-onay sa usa ug usa. Ayaw gubaa ang binuhat sa Dios tungod lang sa pagkaon. Sa pagkatinuod malinis ang tanang butang, apan dautan nga buhat sa usa ka tawo ang pagpahipangdol sa uban pinaagi sa iyang pagakan-on. Ang maayo mao ang dili pagkaon ug karni o pag-inom ug bino o pagbuhat sa bisan unsa nga makapangdol sa imong igsoon. Ang pagtoo nga anaa kanimo, hupti kana diha lamang sa imong kaugalingon sa atubangan sa Dios. Malipayon ang tawo nga walay ikahukom batok sa iyang kaugalingon tungod sa butang nga iyang ginauyonan. Apan ang tawo nga may pagduhaduha mahitungod sa kan-onon, ug unya mokaon niini, mahinukman siya sa silot, kay ang iyang pagkaon dili man gumikan sa pagtoo; kay ang tanan nga dili gumikan sa pagtoo, kini sala." (Roma 14:2-23) 

Ako nanghinaut nga bisan niining hamubo nga saysay ako nakahatag ug igong pagpasabot sa hinungdan ngano nga kitang mga Kristiyanos gitugtan man nga mokaon ug karne sa baboy. Hinaut nga sa kanunay magpuyo kita nga malamboon sa pagtoo, pinaagi ni JesuCristo nga atong Ginoo.